مهما يجور الوقت مابركع. للشاعر رضوان المرادي

مهما يجور الوقت ما بركع   يقول إبن اليمن مهما يجور الوقت ما بركع

ولااحني هامتي غير بْصلاتي وغيرها ماطيع

وإذا جاء الموت أرحب به مية ترحيب وأتطلّع

لموتة عز مهما كان حجم الهول  والترويع

مماتي كالشجر واقف وأشوف إنّي به أتواضع

ولولا عزّتي بالله ماستلقيتت في التشييع

إلهى سيدي مولاي باركع وامتثل وأرفع

يديّا وأطلبك وأقسم عليك بعزتك ماضيع

وانا ثابت على مبداي لا أتململ ولا أتمعمع

ولا اتغير ولااتحول ولا اتمطوع مع التطويع

ولا اتعالى على غيري ولا اتهجم ولا اتصنع

ولا اتشدق ولا اتزندق ولا اتقبل قليل الريع

فكيف أقبل مكان الدون وانا من سماه أرفع

وكيف أتهوّد وديني ونفسي يأبوا التطبيع

وكيف أصبر وانا اشاهد عبيد السوء تتشفع

وتتسول من الخارج فالإستقبال والتوديع

شحتوا باسمنا وإحنا بعرش العز نتربع

واذقتونا مرارات الهوان بحجة التوقيع

هل التوقيع ياباسندوه من شان يتشرّع

نظام الشحت لاصحابك وباشرته على التوزيع

هل التوقيع ياباسندوه من شان يتوسع

نفوذ المشترك وإحنا ضحايا خدمة التوسيع

وهل تشويه صورتنا براءات أختراع أجمع

عليها المشترك وأنته مدشّن حملة التجميع

انا أتوقع تجاوبني نعم بالفعل واتوقع

إذا ثوب الحياء مشقوق لاجدوى من الترقيع

وانا أتوقع إذا ريس حكومه كامله دمَّع

فحالات التسول منجزات الريس الدُمّيع

وإذا راس الحكومه في جحور الفرقه مدرّع

فانا اتوقع يضيع الشعب في التفريق والتدريع

وإذا راس الحكومه يطلب أهل المال  تتبرع

لشعبه فاليمن مايرتضي بسياسة التجويع

سمعت القول ياباسندوه وإن ماسمعت إسمع

فذي مثلك ثقيل السمع يسمع من صدى الترجيع

شموخ الشعب خط أحمر وفي راسه شجاع أقرع

ومن يتجاوز حدوده يضيع ومن معاه يضيع

فاذا كنته يماني حر فافهمها من المطلع

وإذا كررته الغلطه فلا شك القضاء تربيع **** كلمات الشاعر رضوان احمد المرادي الشاعر رضوتن